Otvoreno pismo predsjednici Republike Hrvatske Kolindi Grabar-Kitarović *

Boh, Koli!

Pišen ti po domaći aš si naša i zato ča nisi čakafski pozabila za sen tega ča si već po svete nego doma. Ne pišen po grobniški aš nisam Gromišćica ma ćeš sejno razumet. Lepa moja i naša hrvacka i srpska i od seh drugeh manjin Koli. Ja mislin da si ponemela kad si videla ča nan se dogaja. Mi švicarci smo va kurce s kega nas morda moreš ti zvuć.

Zač ti pišen? Zato ča si friška. Si okol tebe su gnjusi z pedigrejon. Pedigre? Kako se pedigre reče na čakafsken? Pitaj boga. Kada rečen da su si okol tebe gnjusi ne mislin samo na tvoji z hadezeja nego i na oni z ezdepeja i oni z… Ki bi ih se pobrojil? Pišen ti i zato ča si za vreme kampanji vapila, žile na vrate su ti bile kako špagi, da si ti tu kade si aš oteješ pomoć semi ki živeju va Hrvackoj.

Jako su ti srcu mili ribari, delafci, težaki. Razumen te, ti si z Grobnika, ženska z naroda, tvoj otac ni za vreme Jugoslavije bil ni ministar ni poslanik, ni se ono ča su bili oci od oveh drugeh. Kolinda Nacijonale, to si ti. Koli, ako nan sada nećeš pomoć, ako sada nećeš, biš ti rekla, tresut šakom po stolu, kada ćeš?

Ima nas jeno tristo tisuć ki će, ako ti ča ne storiš, krepat od glada. Neki nan govore da smo privilegirani, imamo delo, da nimamo ne bimo dobili kredit, zdignuli smo kredit da bimo kupili stan, kako da se ne more živet i bez krova. Si mi smo misleli da je jeno od osnovneh čovečjeh pravi pravo na krov nad glavun.

Zajebali smo se aš su nas prevarili. Banke, političari, mediji. Banke aš njin je to delo, političari aš su korumpirani, mediji aš su banke najveći oglašivači. Vlasnik tvojga i mojga Novega lista je Zagrebačka banka. Z Jutarnjega lista nan poručuju da je za se nas najboje da gremo va lični bankrot. Zač ni njihov Pavić šal va lični bankrot? Zač su banki uz velu pomoć Grobničana Linića EPH-u oprostili ki zna koliko milijuni kun a mi moramo poć na cestu i još banke ostat duži.

Koli, ti si svecka ženska, ne biš va NATO finila da nisi, špjegaj mi kako to da Mađari ki nanke more nimaju moru banki poslat va šesni kurac a mi ne moremo? Udri po nekakovemu stolu i zavapij onako kako ti to znaš: \”Hrvati i Hrvatice, građani i građanke, ribari, seljaci i težaci, ja sam ovdje zbog vas. Spasit ću vas!\”

Spasi nas. Si govore da si sluškinja od onega Karamarka ki se nasmeje jedanput va deset let. Nisi ti njegova sluškinja. Za ki mesec će i on doznat da si veći Karamarko od njega. Verujen va te. Ti si mi jedina nada. Va nedeju na polne, dvajset i petega jenara, ja ću v Reke stat pred Privrednu banku Zagreb, tamo puli Kosega turna. Pridi doma, daj nan podršku. Ako nas spasiš bit ćeš doživotna precednica Hrvatske. Vapit ćemo ti: \”Mi smo Kolindini, Kolinda je naša!\”

Koli, naši domaći judi, tvoji i moji, užaju reć, krepat ma ne molat. Jeno govore, drugo delaju. Jeni su krepali, drugi su molali. Draga Kolinda, ti si nan jedina nada. Ti ćeš prvo krepat nego molat. Takovi nan rabe. A moreš malo poćakulat i z onen Orbanon Viktoron z Mađarske. Dva više znaju nego jedan.

Boh, Kolinda moja mila. Smiluj nan se.

Vedrana Rudan

* U nedjelju dana 25. siječnja u 12.00 stajat ću ispred riječke Privredne banke pokraj Kosog tornja. Švicarci i oni koji su uz nas, pridružite mi se. Smrt lopovima! HOĆEMO ŽIVOT!

foto: Roberta F.


37 Comments

  1. Milomir
  2. dona kihot
  3. Dragan
  4. Ich
  5. Ich
  6. Verica
  7. zelenaš-kamataš
  8. suzana
  9. skoric
  10. Ciril
  11. Đorđe
  12. zgubidsn
  13. vasa
  14. NESAVRŠEN
  15. Zorica Calic
  16. Akademica
    • millica
  17. lemi
  18. ni ipe kune ni kunelica
  19. vojbel
  20. Nochobdija
  21. Dicus Biggus
  22. Ich
  23. AutonomnaIstra
  24. Za Hrvatsku BEZ komunista
  25. ivanka
  26. ivanka
  27. Jerko
  28. Arkadijue
  29. Đuro
  30. Pekeš
  31. miloš škrbović
  32. proba