Lepi* moji!

Jutra va sedan ur večer va antikvarijate Ex Libris na Rive iman promociju libra \”Život bez krpelja\”.  Zač pišen čakavski? Vidite kamo smo arivali? Mi domaći, kad otejemo neč napisat ili reć, mi to moramo špjegat.

Va Hrvatskoj je va mode nacionalizam, da ne rečen fašizam, ovdeka j\’ stalno neki ugrožen, a jako se malo poveda koliko smo v Reke, i ne samo v Reke, ugroženi mi domaći. Toliko su nas ovi veli hrvacki Hrvati pojili da ja već ne znan kako se po domaću reče \”ugrožen\”.

Otejen reć, se nas je manje, ma nas je, zato pridite jutra va Ex Libris. Vidite, i ta Ex Libris. Ča ni ta antikvarijat mogal imet neko domaće ime? \”Bira, rakija i kafe za pet kun\” mi boje zvoni. On Željko, sigurno ni domaći, se j\’ ćapal latinskega. Judi moji, čakavci moji dragi, ni Latini nan ne daju mira.  Ki got v Reku pride na dva dana ostane dvajset let i onda nan na dugo i široko poveda ča puli nas ne vaja.

Znan, ćaro mi j\’ da van se ne gre va \”Ex libris\”, ki danas još čita? Zato ću van reć da smo za vas on Latin Željko i ja Domaća parićali jako dobro vino, nažalost ni čistokrvno, prišlo j\’ z Dalmacije, ma kolačići su z Viškova.

Na fešte od libra će bit moj urednik Drago Glamuzina, voditeljica će bit vela hrvatska pisačica Ivana Bodrožić. Ste zapametili?

Jedva čekan da pridete si vi ki ste za libar parićani. Si ki su za Dom spremni neka ostanu doma.

Hvala lepa i vidimo se.

Vedrana Rudan, Čakavka Od Stoljeća Petega

*Ne, ne, munjenci nepismeni, ovo \”lepi\” ni srbizam